[عارف الشمري]

دنياك هذي كلها هز فاروق
ماتعرف الصاحب من اللي معاديك
وأكثر كلام الناس بالمكر والبوق
يهرج معك والى تقفيت يرميك
المال دايم صاحبه يرتفع فوق
والقل خايب لو ترفعت يرخيك
عزي لمن دور لها عند مخلوق
إما بخل والا متن يوم يعطيك
أوصيك بالطيب اذا كان لك ذوق
ارمه وراك ولازم انه يلاقيك
يالعبد هون كل مطرود ملحوق
لاتستهن لك رب ماهو مخليك
اللي جعل لك روح جاعلك مرزوق
كما تكفل بك من الخلق كافيك
يعطي وباب الرزق ماهو بمغلوق
واذا طلبته وانت محتاج يافيك
الرزق له حسبه وله وقت مطلوق
وان مت ماهو عند قبرك يناديك
والموت جايك لو تقع جوف صندوق
دع بابك من حذر لايعنيك
لايشغلك مالك ترى المال ممحوق
مامالك الا ماتمده أياديك
ان كان مالك يافتى ضيق السوق
تراه عند الموت ماهو منجيك
الجار والعاني لهم شرط وحقوق
والضيف واجب تكرمه يوم يوافيك
وان كان تبغي تاخذ المدح مطبوق
خلك مشمر دون ضيفك وعانيك
صون الامانه واظهر الهرج بصدوق
ولاتعاشر صاحب البوق يعديك
لاتصحب الخاين ولا تامن النوق
وان لاح براق الحيا عذرت فيك
والدرب لاتامنه لو كنت مرفوق
الا بحد في يمينك يباريك
اترك طريقة كل عاشق ومعشوق
ترمي بروحك في الشر ثم يرميك
والكلب مايتبعك لو تلبسه طوق
لو من خلاخيل الذهب مايراعيك
وبالصبر تغلب صاحب العزم ياشوق
والعزم طيب مير حزات يوريك
واقزح الى منك عن الشر مدقوق
واحذر صديقك واحذر اللي يواليك
هذا كلام الصدق ماهو بمسروق
وابيات ياقلبي بناها يسليك
من هاجس يطمي كما بحر صافوق
احذر على قلب الشقي يوم يطريك
يارب تجعلني من النار معتوق
واجعل كلامي طيب يوم اوافيك